ဆွမ်းတော်စွန့်စာကို စားအပ်၊ မစားအပ်

 

ပြီးခဲ့သော တန်ဆောင်မုန်းလ ပြည့်နေ့က ဖြစ်ပါသည်။

ကျွန်မသည် ဘုရားရှင်အား ပန်း၊ ရေချမ်း၊   ဆီမီးများ လှူဒါန်းရန် ပြင်ဆင် နေချိန်ဖြစ်လေသည်။

ထိုတန်ဆောင်မုန်းလပြည့်နေ့ သည် အဘမင်းသိင်္ခ ရှိစဉ်ကတည်းက ကျင်းပခဲ့သည့် ဆေးပေါင်းခပွဲတော်ကို ဆရာဇင်ယော်နီ ဦးဆောင်လျက် ရွှေပေါ် ကျွန်းကျောင်းရှိ အဘမင်းသိင်္ခ တန်ဆောင်းတွင် ကျင်းပရန် အပြေးအလွှား အလုပ်များနေကြချိန် ဖြစ်လေသည်။

ထို့ကြောင့် မနက်ခပ်စောစော ကပင် အိမ်ဘုရား၌ လှူဖွယ်၊ ပြုဖွယ် ကိစ္စများအား ခပ်သွက်သွက်ပင် လုပ် ဆောင်နေရသည်ဖြစ်ရာ သမီးဖြစ်သူ အားလည်း အလုပ်တွင် ဝိုင်းကူညီပါရန် စည်းရုံးထားရ လေသည်။

ကျွန်မသည် ထိုသို့ဘုရားရှင်အား လှူဒါန်းရန် သစ်သီးများအား ရေဆေး သန့်စင်၍ ဆွမ်းပွဲများ ပြင်ချိန်တွင် ကိုးနှစ် ခန့်ရှိသေးသော သမီးဖြစ်သူက တတ်စွမ်း သမျှ ဝိုင်းကူရင်း –

“မေမေ စပျစ်သီးတွေက အချို သီးလား။ ဟိုတစ်ခါ ဆွမ်းတော်က စွန့်တဲ့ ပျားလိမ္မော်ကတော့ ချဉ်တယ်နော်”

စ သည်ဖြင့် စကားဆိုလေသည်။ ထိုအခါ ကျွန်မက –

“သမီးကို ပြောထားရဦးမယ်။ ဘုရားဆွမ်း တော်စွန့်တာကို စားရင် ဘုရားဝေယျာဝစ္စကို ဝိုင်းလုပ်ရတယ်။ အဲဒီလိုမလုပ်ဘဲ ဆွမ်းတော်စာကို မစားကောင်းဘူး”ဟု ပြောလိုက်လျှင် သမီးက

“သမီးလည်း အဲဒါကိုပဲ မေးချင် နေတာ။ ဟိုနေ့က ကျောင်းကို အသီးတွေ ထည့်သွားတယ်လေ။ သူငယ်ချင်းတွေကို လည်း သမီးက ကျွေးတာပေါ့။ ဆွမ်းတော် စွန့်တာတွေကို ထည့်လာတာလို့ ပြော ပြတော့ သူငယ်ချင်းတစ်ယောက်ကပြော တယ်။ ဆွမ်းတော်စာကို မစားကောင်းဘူးတဲ့။ တစ်ယောက်ကတော့ ဆွမ်းတော်စာ စားရင် ဥာဏ်ကောင်းတယ်တဲ့။ နောက် တစ်ယောက်ကလည်း ပြောပြန်တယ် ဆွမ်းတော်စာစားရင် ဥာဏ်ထိုင်းတယ်တဲ့။ တစ်ယောက်က ပြောပြန်တာကတော့ သူတို့အိမ်မှာတော့ ဆွမ်းတော်စာကို စွန့်ပြီးရင် အိမ်ရှေ့က သစ်ပင်ထောင့်မှာ ငှက်တွေကို ကျွေးတာတဲ့။ အမျိုးစုံတွေ ပြော ကြတာပေါ့မေမေရယ်။ အဲဒီစကားတွေနဲ့ ပတ်သက်ပြီး သမီး ရှင်းရှင်းလင်းလင်း မှတ်လို့ရအောင် မေမေသိတာလေးရှိရင် ပြောပြပါ့လား” ဟု ပြောလေရာ ကျွန်မ လည်း ဖတ်မှတ်ဖူးသော တည်တော ဆရာတော်ဘုရားကြီး၏ စာပေများထဲမှ ဆွမ်းတော်စာနှင့် ပတ်သက်သော အ ကြောင်းအရာများအား သတိရမိလေ တော့သည်။

သို့ရာတွင် အလုပ်များ နေချိန်ဖြစ် ၍ ညမှသာ ပြောပြနိုင်မည့်အကြောင်း သမီးအား ဖျောင်းဖျရင်း စကားရပ်ခဲ့ရ လေသည်။

ထိုနေ့ညက ဆေးပေါင်းခပွဲတော် သည် ည ၇ နာရီခန့်တွင် ပြီးစီးခဲ့သော် လည်း ပစ္စည်းများသိမ်းဆည်းကြရင်းဖြင့် ညဆယ်နာရီကျော်မှ အိမ်သို့ပြန် ရောက် ခဲ့လေသည်။ သမီးသည် သိချင်နေသော အကြောင်းအရာရှိသဖြင့် ကျွန်မအား စောင့်ဆိုင်းနေဟန် ရှိလေသည်။ ထို့ ကြောင့် ကျွန်မလည်း သမီးအား ဆွမ်း တော်စာနှင့် ပတ်သက်သည့်အကြောင်း အရာများအား မှတ်သားမိသမျှ အောက် ပါအတိုင်းရှင်းပြဖြစ်ခဲ့ပါလေတော့သည်။

ဆွမ်းတော်စာ စားတာနဲ့ပတ်သက်ပြီး မဟာရာဇဝင်တော်ကြီးမှာ ဒီလို ဆိုသတဲ့။ ပုဂံပြည်မှာ အနော်ရထာမင်း မတိုင်မီက အရည်းကြီးရဟန်းများ လွှမ်း မိုးခဲ့တယ်လို့ ဆိုတယ်။

တစ်ရက်မှာ သထုံပြည်က ရဟန္တာ ရှင်အရဟံဟာ ပုဂံပြည်ကို ကြွလာသတဲ့။ အနော်ရထာမင်းကြီးဟာ ရှင်အရဟံကို အလွန်ကြည်ညိုတဲ့အ တွက် ရှင်အရဟံရဲ့အမိန့်အတိုင်း ပိဋကတ်သုံးပုံနဲ့ ဓာတ်တော်မွေတော်တွေကို သထုံ မနူဟာမင်းထံ တောင်းခံစေတယ်။ မနူဟာမင်းဟာ ထိပါးလိုသောစိတ်နဲ့ ပိဋ ကတ်တော်နဲ့ ဓာတ်တော်တွေကို မပေးဘဲ မချေမငံ ပြောဆိုလိုက်သတဲ့။

အဲဒီလို မချေမခံပြောဆိုမှုကြောင့် အနော်ရထာမင်းဟာ သထုံပြည်ကို အလုံးအရင်းနဲ့ ချီတက်ပြီး မင်းနဲ့တကွ သိမ်း ပိုက်တော်မူလိုက်သတဲ့။ ပုဂံကို ပြန် ရောက်တဲ့အခါ သထုံက ပါလာခဲ့တဲ့သူရဲ ကောင်းတွေ ပညာသည်တွေကို အသီး သီး အစုအကွက်ချပြီး နေစေတယ်။ မနူ ဟာမင်းကိုတော့ မြင်းကပါအရပ်မှာ အ လုပ်အကျွေးနဲ့တကွ ချထားတယ်။

မနူဟာမင်းဟာ စကားပြောရင် ခံတွင်းက စက်ပြောင်ပြောင် အရောင် ထွက်သတဲ့ အနော်ရထာမင်းထံ မနူဟာ မင်းလာရောက်ဦးချတဲ့အခါ ကြက်သီး မွေးညှင်းထပြီး ထိတ်တလန့်လန့် ဖြစ်ရ သတဲ့။ ဒါကြောင့် မနူဟာမင်းရဲ့ ဘုန်းတန် ခိုးအာနုဘော် ညံ့ဖျင်းသွားအောင် မနော လင်ဗန်းမှာ စားတော်ကိုပြင် ဘုရားမှာ တင်ပြီးမှ မနူဟာမင်းကို အဲဒီဆွမ်းတော် စာကို ကျွေးစေသတဲ့။ ရက်အတော်ကြာ လာခဲ့တော့ မနူဟာမင်းရဲ့ စက်အရောင် ဟာ သံသရာကျင်လည်သရွေ့ သူနိုင် သည်ကို မဖြစ်ရလိုလို့ ဆုတောင်းရင်း ယခုမနူဟာဘုရားကို တည်ထားပြီး သူ့ ကိုယ်သူ လုပ်ကြံသွားတယ်လို့ ရာဇဝင် မှာဆိုတယ်။ အဲဒီသမိုင်းကြောင်းကို စွဲပြီး ဆွမ်းတော်စာ မစားကောင်းဘူးဆိုတဲ့ စကားရပ်ဖြစ်လာတာ ဖြစ်နိုင်တယ်လို့ ဆိုတယ်။

အမှန်တကယ်တော့ မနူဟာမင်း ဟာ ရိုးရိုး ဆွမ်းတော်စာစားလို့ ဘုန်း တန်ခိုး ညံ့သွားတာမဟုတ်ပါဘူး။ ခွေးစာ ကျီးစာ ထည့်ကျွေးတဲ့ သင်ပုတ်ခွက်ပေါ်ကို ဆွမ်းတော်စာကို စွန့်ပြီးမှ မနော လင်ဗန်းထဲ ပြန်ထည့်ကျွေးတဲ့အစာကို စားလို့ ဘုန်းတန်ခိုးညံ့သွားတာ ဖြစ်တယ် လို့ဆိုတယ်။

အသရေမဲ့တဲ့ သင်ပုတ်ခွက်ထဲ ကို စွန့်လိုက်တဲ့ ဆွမ်းတော်စာကို ပြန်ယူ ကျွေးလို့ ဘုန်းတန်ခိုးညံ့သွားတာ ဖြစ်နိုင် တယ်လို့ဆိုတယ်။ ဒါမှမဟုတ်ရင်လည်း ဆွမ်းတော်စာ စားပြီး ဗုဒ္ဓဝေယျာဝစ္စပြု လုပ်လို့ ဘုန်းတန်ခိုးညံ့သွားတာလည်း ဖြစ်နိုင်တယ်။ ရိုးရိုး ဆွမ်းတော်စာစားရုံနဲ့ တော့ ဥာဏ်ကောင်းမကောင်း မဆိုလို သော်လည်း ဘာမျှလည်း ဖြစ်ဖွယ်မရှိဘူး လို့ ဆရာတော်ဘုရားကြီးရဲ့ စာပေထဲမှာ မှတ်သားရတယ်”ဟု ရှင်းပြလိုက်ရာ သမီးလည်း အတန်အသင့် ကျေနပ် သော အမူအရာကို ပြရင်း နောက်ထပ် မေးခွန်းတစ်ခုသို့ ဆက်ရန်ဟန် ပြင်လိုက် လေရာ ကျွန်မလည်း လက်ကာပြရင်း

“တော်ပြီသမီးရေ …မေမေလည်း ပင်ပန်းနေပြီ …၊ နောက်နေ့မှပဲ ဆက်ပြီး ပြောပြမယ်နော်” ဟု စကားစ ဖြတ်၍ တစ်ခန်းရပ်ခဲ့ပါလေတော့သည်။

 

ဇင်လဲ့ရည်နွယ်

Comments

comments

Post Author: manawmaya