ရာထူး တိုးခါနီးပြီးလော….

ဇင်ယော်နီ

စာဖတ်ပရိသတ်များထဲမှာ ဝန်ထမ်းမိတ်ဆွေ တွေ လည်းရှိကြပါလိမ့်မယ်။ ဘယ်ဝန်ထမ်းဖြစ်ဖြစ် ရာထူးက တော့ တိုးနိုင်သမျှ တိုးချင်ကြတာပဲပေါ့ဗျာ။ ရာထူးတိုးဖို့အတွက်ဆိုရင် ကိုယ့်ဘက်ကကြိုးစား စရာရှိတာလည်း ကြိုးစားရမှာပေါ့ …။ ဒီတိုင်း ပြည်လိုနေ ရာမျိုးကျတော့ ကြိုးစားတဲ့အပြင် အထက်လူကြီး အဆင် ပြေအောင်၊ အောက်လက်ငယ်သား အမြင်ကြည်အောင်လည်း အရေးကြီးသေးတာပေါ့ …။ ပြုံးပြစရာရှိတော့လည်း ပြုံးပြရမှာပေါ့။

အခုပြောမယ့်နည်းလေးကတော့ ဂမ္ဘီရနည်းစနစ်နဲ့ အထောက်အပံ့ ဖြစ်စေဖို့အတွက်ပါ။ ရာထူးတိုဖို့ အသံတွေဘာတွေထွက်လာပြီ၊ လျှောက်လွှာတွေဘာတွေ တင်ရပြီ၊ အင်တာဗျူးတွေ ဘာတွေ ဖြေရတော့မယ်ဆိုရင် …

မိမိရဲ့မွေးနေ့ မနက်ပိုင်းမှာ ဘုရားတစ်ဆူကိုသွားပါ။

တတ်သမျှမှတ်သမျှ  ရှိခိုးပူဇော်ဖူးမြော်ပါ။

ပြီးတော့ မိမိရဲ့မွေးနံထောင့်မှာ ထီးဖြူသက်စေ့နဲ့ ရွှေထီးသက်စေ့ လှူပါ။ (ထီးဖြူအကြီးကြီးတွေ၊ ရွှေထီးအကြီးကြီးတွေကို မျက်စိထဲ မမြင်လိုက်ပါနဲ့ဦး၊ ဘုရားတွေမှာ ထီးဖြူသေးသေးလေးတွေ၊ ရွှေထီး သေးသေးလေးတွေ ရှိပါတယ်။ တော်ကြာ အကြီးကြီးတွေ လှူရမယ်လို့ အောက်မေ့နေရင် ရာထူးတိုးတာကနောက်မှ ထီးဖိုးအတွက် ရှိတဲ့အိမ်လေး ပေါင်လိုက်ရမှာစိုးလို့ပါ …)

အဲဒီလို ထီးဖြူသက်စေနဲ့ ရွှေထီးသက်စေ့ လှူတဲ့အပြင် မြတ်စွာဘုရားရဲ့ပုခုံးတော်တွေမှာ ရွှေချကုသိုလ်ပြုလုပ်ရင်းလည်း ရာထူးတိုးဖို့ ဆုတောင်းဖို့ ဖြစ်ပါတယ်။

အဲဒါကတော့ ရွှေသင်္ကန်းကပ်လှူဖို့၊ ရွှေချဖို့ အဆင်ပြေတဲ့ရုပ်ပွားတော်မှာ ပြုလုပ်ရန်ဖြစ်ပါတယ်။ ရာထူးတိုးအံ့ဆဲဆဲ အလားအလာကောင်းနေသော မိတ်ဆွေများအတွက် အထောက်အပံ့ဖြစ်ကြပါစေဗျာ …။

သဗ္ဗေဓမ္မာ ဇင်ယော်နီ

Comments

comments

Post Author: manawmaya