ကမ္ဘာကြီးကို ဘေးအန္တရာယ်အမျိုးမျိုးနှင့် တိုက်ခိုက်နေသည့်ကိစ္စ ၁၅ နှစ် စောင့်ဆိုင်းပေးမည်ဆိုပါလား။

ကျွန်တော် ၂-၁-၂၀၁၉ ရက်နှင့် ၂၃-၁-၂၀၁၉ ရက်ထုတ်ဝေသော မနောမယဂျာနယ်များတွင် ကမ္ဘာကြီးကို တန်ခိုးကြီးနတ်ကြီး ငါးသိန်းက သဘာဝဘေးအန္တရာယ်အမျိုးမျိုးနှင့် ဖျက်ဆီးမည့်အကြောင်း ရေးသားတင်ပြခဲ့ပါသည်။

ထိုသို့နတ်ကြီးများ ဖျက်ဆီးမည်ကို ကျွန်တော်နဲ့ အာကာသထဲက အလွန်တန်ခိုးကြီးတဲ့ အစိမ်းရောင်နတ်ကြီးတစ်ပါး  ပူးပေါင်းပြီး ကမ္ဘာကြီးကို မဖျက်ဆီးဖို့ မေတ္တာရပ်ခံ တားမြစ်မည့်အကြောင်း။ ထိုသို့ နှစ်ဦးပေါင်း မေတ္တာရပ်ခံခြင်းကို မူလက တာဝန်ပေးခဲ့သော တန်ခိုးရှင်ကြီးက ဤသို့ မေတ္တာရပ်ခံခြင်းကို မဆောင်ရွက်တော့ဖို့ ညွှန်ကြားတဲ့အကြောင်း ရေးသားတင်ပြခဲ့ပါတယ်။

၁၆-၁-၂၀၁၉ ရက် မနက် ၃ နာရီမှာ အစိမ်းရောင်ဝတ်ရုံနှင့် မဟာအနန္တသဗ္ဗ သန်းပေါင်း  ၅၂၀ဝ တန်ခိုးရှင်ကြီး ကြွရောက်လာပါတယ်။ တန်ခိုးရှင်ကြီးက ကျွန်တော့်ကို ပထမဦးဆုံး ဗေဒင်ဟောနေစဉ်မှာ အဖြူရောင်ဝတ်ရုံနှင့် မဟာအနန္တသဗ္ဗ သန်းပေါင်း ၈၀ဝ၀ တန်ခိုးရှင်ကြီး အမြင့်ပေ ၉၀ ခန့် ကြွရောက်လာပါတယ်။ အဆိုပါ တန်ခိုးရှင်ကြီးက– မင်းကို တားမြစ်စရာ နှစ်ချက်ရှိလို့ ကြွလာတာပါ။

(၁) တို့ကမ္ဘာကြီးကို ဖျက်ဆီးဖို့လုပ်နေတယ်။ မင်း မကာကွယ်ပါနဲ့။

(၂) မင်းဒီကမ္ဘာကြီးကို မကာကွယ်လျှင် မင်းကို ဆုလာဘ်တစ်ခုပေးမည်။ အဲဒီဆုလာဘ်က ရွှေရောင် သဇင်ပန်းခက်တစ်ခက် လက်ဆောင်ပေးမည်။

ကျွနု်ပ်။ ။ ဒီရွှေရောင်သဇင်ပန်းခက်က ဘယ်လိုထူးခြားမှုတွေရှိလို့ပါလဲ။

မဟာအနန္တတန်ခိုးရှင်ကြီး။ ။ ဒီသဇင်ပန်း ခက်က ကမ္ဘာ ငါးကမ္ဘာပိုင်ဆိုင်တဲ့ပုဂ္ဂိုလ်မှသာလျှင် ရင်မှာထိုးခွင့်ရှိတယ်။ ဆိုလိုတာက တို့မင်းကို ကမ္ဘာငါးကမ္ဘာလက်ဆောင်ပေးမည့် သဘောဖြစ်တယ်။

ကျွန်ုပ်။ ။ တန်ခိုးရှင်ကြီးတို့က ကျွန်တော်တို့ ကမ္ဘာကို ဘာကြောင့် ဖျက်ဆီးချင်တာပါလဲ။

မဟာအနန္တတန်ခိုးရှင်ကြီး။ ။ တို့က မင်းတို့ကမ္ဘာကို အကြောင်း ငါးခုကြောင့် ဖျက်ဆီးချင်တာပါ။

(၁) လူသားရဲ့ ခန္ဓာကိုယ်က အမြီးမပါလို့ သဘောမကျတာ။ အခြားသတ္တဝါတွေအားလုံးက အမြီးပါတယ်။

(၂) လူသားတွေက အခြားသတ္တဝါတွေကို အနိုင်အထက်ပြုကျင့်တယ်။

(၃) လူသားတွေက အခြားသတ္တဝါတွေထက် ကိုယ်ကျိုးစီးပွားအတ္တကြီးလွန်းတယ်။

(၄) လူသားတွေက သစ်တောတွေ ခုတ်ယူ သုံးစွဲမှုများလွန်းတဲ့အတွက် သစ်တောတွေအတွင်း နေထိုင်ကျက်စားရတဲ့ သတ္တဝါမျိုးစိတ်ပေါင်း ၆၀ ရာခိုင်နှုန်း ပြုန်းတီးပျောက်ကွယ်သွားရတယ်။

(၅) ကမ္ဘာမြေအတွင်းက ရေနံတွေ မြောက်မြားစွာ ထုတ်ယူသုံးစွဲတဲ့အတွက် ကမ္ဘာလေထုညစ်ညမ်းတာ …

ဒါတွေကို တို့က သဘောမကျဘူး။ အဲဒါကြောင့် ကမ္ဘာကြီးကို ဖျက်ဆီးနေတာပါ။

ကျွန်ုပ်။ ။ တခြားအကြောင်း လေးချက်က ထားပါတော့။ လူသားမှာ အမြီးမပါတာကြောင့် ကမ္ဘာကို ဖျက်ဆီးချင်တာက ကျွန်တော် နားမလည်ပါဘူး။ အမြီးဟာ လူသားက မလိုချင်ပါဘူးလို့ ပြောရတာလည်း မဟုတ်။ သူ့အလိုအလျောက်မပါတာ ဘယ်တတ်နိုင်မှာလဲ။

မဟာအနန္တတန်ခိုးရှင်ကြီး။ ။ ဒါက ဒီလိုရှိတယ်။ မင်းတို့လူသားတွေမှာ လွန်ခဲ့တဲ့ နှစ်ပေါင်း နှစ်သိန်းလောက်က လူသားတွေမှာ အမြီးပါတယ်။ လူသားရဲ့ ကျောဘက် ခါးအောက်ပိုင်းက ပေါက်တယ်။ နှစ်ပေကျော်ကျော်လောက်ရှိတယ်။ နောက် တဖြည်းဖြည်းနဲ့ လူသားတွေမှာ အမြီးကတိုပြီး ပျောက်ကွယ်သွားတယ်။ တို့က အမြီးမပါတဲ့ လူသားကို ကြည့်လို့မရဘူး။ အဲဒါကြောင့် ကမ္ဘာပေါ် က လူသားတွေကို ဖယ်ရှားပစ်ချင်တာပါ။

ကျွန်ုပ်။ ။ တန်ခိုးရှင်ကြီးက အခုလို ကမ္ဘာကြီးကို ဖျက်ဆီးချင်တာ တစ်ပါးတည်းပါလား။ အခြား တန်ခိုးရှင်ကြီးတွေ ပါရှိပါသေးလား။

မဟာအနန္တတန်ခိုးရှင်ကြီး။ ။ ငါ့ရဲ့အထက်က တန်ခိုးရှင်ကြီး ကိုးပါးဆိုတာပါသေးတယ်၊ ဒီကမ္ဘာကြီးကို ဖျက်ဆီးတာဟာ တန်ခိုးရှင်ကြီးကိုးပါးရဲ့ အစီအစဉ်ပါ။

ကျွန်ုပ်။ ။ ဒီကမ္ဘာကြီးကို နှစ်ပေါင်း ၂၀,ဝဝဝ လျှင် တစ်ကြိမ် ဖျက်ဆီးခဲ့တယ်ဆိုတာ မှန်ပါသလား။

မဟာအနန္တတန်ခိုးရှင်ကြီး။ ။ နှစ်ပေါင်း ၂၀ဝဝဝ လျှင် တစ်ကြိမ်ဖျက်ခဲ့တယ်။ ယခင်က နှစ်ကြိမ် ဖျက်ဆီးခံခဲ့ရဖူးတယ်။ ပထမအကြိမ်က ကမ္ဘာပေါ်မှာ မြွေကြီးကဲ့သို့သော သတ္တဝါတွေက အခြားသတ္တဝါတွေကို အနိုင်အထက်တိုက်ခိုက် သတ်ဖြတ်လို့ ကျန်တဲ့သတ္တဝါတွေ ပျက်စီးပျောက်ကွယ်ကုန်လို့ ကမ္ဘာကြီးကို ဖျက်လိုက်ရတယ်။

ဒုတိယအကြိမ်က ဒိုင်နိုဆောလို အကောင်ကြီးတွေက ကျန်တဲ့သတ္တဝါတွေကို ဖျက်ဆီးနှောင့်ယှက်လို့ ကမ္ဘာကြီးကို ဖျက်ဆီးလိုက်ရတယ်။

ကျွန်ုပ်။ ။ ယခင်တန်ခိုးရှင်ကြီးတို့ ဖျက်ဆီးစဉ်က လူသားအချို့ ကျန်နေရစ်တယ်။ ယခုတစ်ကြိမ်ကလူသား မပြောနဲ့ သေးငယ်တဲ့ ပိုးမွှားတွေပါ  မရပ်တည်၊ မရှင်သန်နိုင်အောင် ကမ္ဘာကြီးအတွင်းပိုင်းက ချော်ရည်ပူတွေထွက်လာပြီး သက်ရှိသတ္တဝါ မကျန်အောင် တိုက်ခိုက်မယ်လို့သိရပါတယ်။ အဲဒီလို ကမ္ဘာပေါ်က သက်ရှိသတ္တဝါတွေပါ မကျန်ရစ်အောင် ဘယ်လိုကြောင့် အပြတ်ရှင်းပစ်တာပါလဲ။

မဟာအနန္တတန်ခိုးရှင်ကြီး။ ။ မင်းတို့ကမ္ဘာ ကြီးကို ဒီတစ်ကြိမ် သက်မဲ့ကမ္ဘာကြီးအဖြစ်ထားဖို့ ရည်ရွယ်ပြီး ဖျက်ဆီးတာပါ။

ကျွန်ုပ်။ ။ ကျွန်တော်ကတော့ မဟာအနန္တတန်ခိုးရှင်ကြီးပေးတဲ့ ရွှေရောင်သဇင်ပန်းလည်းမလိုချင်ပါဘူး။ ငါးကမ္ဘာလည်း မလိုချင်ပါဘူး။ ဖြစ်နိုင်လျှင် ဒီကမ္ဘာကြီးဖျက်ဆီးမည့်ကိစ္စကိုပဲ မဖျက်ဆီးဖို့ မေတ္တာရပ်ခံချင်ပါတယ်။ ယခုလည်း ကမ္ဘာ့ခေါင်းဆောင်တွေက ကမ္ဘာကြီးကို ပြန်လည်စိမ်းလန်း စိုပြည်လာအောင် သစ်တောတွေခုတ်တဲ့ကိစ္စ နိုင်ငံတော်တော်များများက တားမြစ်နေကြပါပြီ။ သစ်ပင်သစ်တောတွေကိုလည်း ပြန်လည်စိုက်ပျိုးနေကြပါပြီ။ မျိုးတုံးပျောက်ကွယ်တော့မယ့် သတ္တဝါတွေကိုလည်း မျိုးမတုန်းရအောင် ဂရုတစိုက် စောင့်ရှောက်မွေးမြူနေကြပါပြီ။ ဘေးမဲ့တောတွေ သတ်မှတ်ပြီး ရေနံဓာတ်ငွေ့တွေ သုံးစွဲမှုကိုလည်း လျှော့ချဖို့ အားထုတ် နေကြပါပြီ။ အဲဒါကြောင့် သတ္တဝါတွေကို ငဲ့ညှာသနားသောအားဖြင့် ကမ္ဘာကြီးကို မဖျက်ဆီးဖို့ မေတ္တာရပ်ခံတောင်းပန်ပါတယ်။ အရင်တန်ခိုးရှင်ကြီးကတစ်ဆင့် မဟာအနန္တတန်ခိုးရှင်ကြီး ကိုးပါးကို တင်ပြလျှောက်ထားစေချင်ပါတယ်။

မဟာအနန္တတန်ခိုးရှင်ကြီး။ ။ မင်းတင်ပြတာကို အထက်တန်ခိုးရှင်ကြီး ကိုးပါးကို တင်ပြလျှောက် ထားပေးပါ့မယ်။

ကျွန်ုပ်။ ။ အဲဒီမဟာအနန္တတန်ခိုးရှင်ကြီး ကိုးပါးက ဘယ်လို ပြန်မိန့်ကြားတယ်ဆိုတာလည်း တန်ခိုးရှင်ကြီးကပဲ အကျိုးအကြောင်း ပြန်မိန့်ကြားဖို့ မေတ္တာရပ်ခံပါတယ်။

မဟာအနန္တတန်ခိုးရှင်ကြီးလည်း မနက် ၄း၃၀ နာရီမှာ ပြန်ကြွသွားပါပြီ။

မဟာအနန္တ သဗ္ဗ သဗ္ဗ သဗ္ဗ သန်းပေါင်း ၁၀ဝ၀ အနက်ရောင်ဝတ်ရုံနှင့် တန်ခိုးရှင်ကြီးတစ်ပါး ကြွရောက်တော်မူလာပါတယ်။ (ဒီနေရာမှာ တန်ခိုးရှင်ကြီးတို့ရဲ့ တန်ခိုးအမြင့်ပမာဏကို ရှင်းပြချင်ပါတယ်။ ကျွန်တော်က တန်ခိုးရှင်ကြီးတွေရဲ့ တန်ခိုးအဆင့်အတန်းကို အောက်ပါအတိုင်း သတ်မှတ်ပါတယ်။ ဒါကိုလည်း ကြွလာတဲ့ တန်ခိုးရှင်ကြီးအမျိုးမျိုးက သဘောကျ လက်ခံပါတယ်။ တန်ခိုးရှင် အနန္တတန်ခိုးရှင် မဟာအနန္တ တန်ခိုးရှင်ကြီး၊ မဟာအနန္တ သဗ္ဗတန်ခိုးရှင်ကြီး၊ မဟာအနန္တသဗ္ဗ သိန်းသန်း ၁၀ဝဝ- ၂၀ဝ၀ (သိန်း ပေါင်း တစ်သိန်း၊ သိန်းပေါင်းနှစ်သိန်း၊ သန်းပေါင်း တစ်သန်း၊ သန်းပေါင်းနှစ်သန်း) စသည်ဖြင့် အဆင့် အလိုက် သတ်မှတ်ခေါ်ဝေါ်ပါတယ်။ သည်ထက်မြင့်သည့် တန်ခိုးရှင်ကြီးများကိုမူ သဗ္ဗ စကားလုံး နှစ်လုံး သုံးလုံးတိုးပြီး ခေါ်ဆိုပါတယ်။) ယခုကြွလာတဲ့ တန်ခိုးရှင်ကြီးက မဟာအနန္တ သဗ္ဗသဗ္ဗသဗ္ဗ သုံးလုံးဆိုတော့ ကျွန်တော်တွေ့ဖူးသမျှ တန်ခိုးရှင်ကြီးတွေထဲမှာ အမြင့်ဆုံး တန်ခိုးအကြီးဆုံး တန်ခိုးရှင်ကြီး ဖြစ်ပါတယ်။

ကျွန်ုပ်။ ။ တပည့်တော် ယခုကြွရောက်လာတဲ့ မဟာအနန္တ သဗ္ဗ သဗ္ဗ သဗ္ဗ သန်းပေါင်း ၁၀ဝ၀ တန်ခိုးရှင်ကြီးကို ရိုသေစွာ ကြိုဆိုပါတယ်ခင်ဗျား။ သည်လောက်တန်ခိုးကြီးတဲ့ တန်ခိုးရှင်ကြီးကို ကျွန်တော် တစ်သက်နဲ့တစ်ကိုယ် တစ်ခါမှ မတွေ့ဘူးပါဘူး ခင်ဗျား။  ကြွရောက်လာတဲ့ အကျိုးအကြောင်း အမိန့်ရှိတော်မူပါ ခင်ဗျား။

မဟာအနန္တတန်ခိုးရှင်ကြီး။ ။ မင်းဆီကို အရေးကြီးတဲ့ အကြောင်း သုံးခုနဲ့ ကြွလာတာပါ။

(၁) မင်းဆီကို စောစောက အနက်ရောင် အနန္တတန်ခိုးရှင်ကြီးတစ်ပါးက ပြောတဲ့ ကမ္ဘာကြီးကို သဘာဝ ဘေးအန္တရာယ်အမျိုးမျိုးနဲ့ ဖျက်ဆီးမည့် ကိစ္စမှာ ငါတို့ တန်ခိုးရှင်ကြီး ကိုးပါးက ဖျက်ဆီး ခိုင်းတာဖြစ်ပါတယ်။ ဖျက်ဆီးခိုင်းတယ် ဆိုရာမှာ လည်း အကြောင်းမဲ့ မဟုတ်ဘူး။ မင်းသိပြီးသားပဲ။ အကြောင်း ငါးချက်နဲ့ ဖျက်ဆီးခိုင်းတာဖြစ်တယ်။ မင်းက မဖျက်ဆီးဖို့ တောင်းပန်မေတ္တာရပ်ခံတဲ့ အထဲမှာ သစ်ပင်သစ်တောတွေ မခုတ်ရအောင် နိုင်ငံ အစိုးရတွေက တားမြစ်နေကြပါပြီလို့ ပြောသွားတယ်။ မင်းဘယ်လောက်တာဝန်ခံပြီး ဆောင်ရွက် နိုင်မှာလဲ။ ငါးနှစ်အတွင်း ကမ္ဘာမူလ သစ်တော ဧရိယာရဲ့ သုံးပုံတစ်ပုံ ပြန်ရအောင် စိုက်ပျိုးစေချင်တယ်။ သတ္တဝါတွေကို သူ့အမျိုးအစားနဲ့သူ မျိုးမတုန်းရအောင် စောင့်ရှောက်ကာကွယ်တဲ့လုပ်ငန်းကို နိုင်ငံအစိုးရတွေက ဆောင်ရွက်စေချင်တယ်။ ကမ္ဘာမြေအတွင်းက ရေနံတွေကိုလည်း တစ်နှစ်လျှင် ၂ ရာခိုင်နှုန်း ထုတ်လုပ်မှု လျှော့ချသွားစေချင်တယ်။ ငါးနှစ်သုံးကြိမ် ၁၅ နှစ်စောင့်ကြည့်မယ်။ အဲဒီ ၁၅ နှစ် အတွင်း ကမ္ဘာကြီး အခြေအနေတိုးတက်ပြောင်းလဲလာလျှင် မင်း မေတ္တာရပ်ခံတဲ့အတိုင်း မဖျက်ဆီးတော့ဘူး။

ကျွန်ုပ်။ ။ အရှင်မြတ်တို့က စကြဝဠာတွေ မဟာစကြဝဠာကြီးတွေကို အုပ်ချုပ်တဲ့ မဟာအနန္တ တန်ခိုးရှင်ကြီးများပါလား ဘုရား။

မဟာအနန္တ တန်ခိုးရှင်ကြီး။ ။ တို့ ကိုးပါးက မဟာစကြဝဠာကြီးတွေသာ မကပါဘူး။ လောက ဓာတ်ကြီးတစ်ခုလုံးအတွင်းမှာ အာကာသကြီးပေါင်း ၈၅၀ ရှိတယ်။ အဲဒီအာကာသကြီးပေါင်း ၈၅၀ အတွင်းမှာရှိတဲ့ မဟာစကြဝဠာအားလုံးကို အုပ်ချုပ်တဲ့ မဟာအနန္တသဗ္ဗ တန်ခိုးရှင်ကြီးများ ဖြစ်ပါတယ်။

ကျွန်ုပ်။ ။ ဤမျှလောက်တန်ခိုးကြီးတဲ့ တန်ခိုးရှင်ကြီးများနဲ့တွေ့ရတာ အလွန်ဘဲ ဝမ်းမြောက်လှပါတယ်ဘုရား။ တပည့်တော်ဘက်က မရိုမသေ ပြုမူပြောဆိုမိတာ ရှိလျှင်လည်း ခွင့်လွှတ်တော်မူပါဘုရား။ အခြား တပည့်တော်မှာ လိုအပ်ချက်ရှိရင်၊ ကမ္ဘာသူ ကမ္ဘာသားတွေနဲ့ ပတ်သက်ပြီး လိုအပ်သည်များရှိရင် မိန့်ကြားတော်မူပါဘုရား။

မဟာအနန္တတန်ခိုးရှင်ကြီး။ ။ မင်းကို နောက်ဆုံး နှစ်ချက်ပြောချင်တယ်။

(၁) မင်းတို့ကမ္ဘာနဲ့ မင်းတို့လူသားတွေကို တို့ ဒုက္ခပေးလာတာ ငါးနှစ်ရှိပြီ။ အခု ကမ္ဘာကြီးကို သဘာဝ ဘေးအန္တရာယ်အမျိုးမျိုးနဲ့ ဒုက္ခပေးနေတဲ့ နတ်ကြီး ငါးသိန်းကို ပြန်ခေါ်သွားမယ်။

(၂) တို့မင်းတို့ကမ္ဘာကို ၁၅ နှစ်စောင့်ကြည့်မည်။ တို့ပြောတဲ့အတိုင်း ဖြစ်မလာဘူးဆိုလျှင် ကမ္ဘာကြီးကို လုံးဝဖျက်ဆီးပစ်မယ်။

မဟာအနန္တ သဗ္ဗ သဗ္ဗ သဗ္ဗ သန်း ၁၀ဝ၀ တန်ခိုးရှင်ကြီးလည်း ပြန်ကြွသွားပါပြီ။

ကျွန်တော်တို့ သဘာဝဘေးအန္တရာယ် အမျိုးမျိုးက ၁၅ နှစ်တော့ သက်သာသွားမယ်ထင်ပါတယ်။ အကယ်၍ မဟာအနန္တတန်ခိုးရှင်ကြီး မိန့်မှာသွားတဲ့ အတိုင်း ၁၅ နှစ်အတွင်း ကျွန်တော်တို့ဘက်က မဆောင်ရွက်နိုင်လျှင်တော့ ကမ္ဘာကြီးကို သက်မဲ့ကမ္ဘာကြီးဖြစ်အောင် တိုက်ဖျက်မယ်ဆိုပါလား။ကြောက်မက်ဖွယ်ကောင်းလှပါလား။ အကယ်၍ ကမ္ဘာကြီး ဖျက်ဆီးခံရလျှင် ကျွန်တော်တို့ရဲ့ ဝိညာဉ်တွေ ဝင်စားစရာပင် လူတွေသက်ရှိသတ္တဝါတွေ ရှိတော့မည်မဟုတ်ပါ။

 

သတ္တဝါကျန်းမာချမ်းသာကြပါစေ …

ဆရာဝင်း(သာကီနွယ်)

Comments

comments

Post Author: manawmaya