ဘောဂ၀တီ နဂါးပြည်သို့

သံလျင်မြို့မှ ကျောက်တန်းမြို့သို့ ဆက်သွယ် ထားသော ကားလမ်း၏ဝဲဘက်တွင် ပျဉ်ထောင် ကျောင်းကျေးရွာ ရှိပါသည်။ ထိုကျေးရွာ၏ မြောက် ဘက်ထိပ်တွင် အောင်ဗောဓိ မြေဇင်းတောရ ဓမ္မ ရိပ်သာ ဟူသော တရားစခန်းလေးလည်း ရှိပါသည်။ အဆိုပါ တရားစခန်းလေးမှာ ကားလမ်းနှင့် အတန် ငယ်ဝေးကွာသဖြင့် ကားသံ၊ လူသံစသည့် ဆူညံသံ များ မကြားရဘဲ တိတ်တိတ်ဆိတ်ဆိတ်ဖြင့် တရား အားထုတ်နိုင်သော နေရာဒေသလေးဖြစ်ပါသည်။ တရားစခန်းလေးမှာ များစွာကျယ်ဝန်းလှခြင်းမရှိပါ။ တရားစခန်းဝင်သော ယောဂီများမှာလည်း အရေ အတွက် များပြားခြင်း မရှိဘဲ တစ်ကြိမ် တရားစခန်း ဖွင့်လျင် ယောဂီစုစုပေါင်းမှာ ၂၅ ဦး သို့မဟုတ် ၃၀ ဦးခန့်သာ အများဆုံးရှိပါသည်။ တရားစခန်း ဝင်သည့် ကာလသည် ၄၅ ရက်ကြာမြင့်သဖြင့် အကြောင်းအားလျော်စွာ လူအများမဝင်နိုင်ကြပါ။ အချိန်မပေးနိုင်ကြပါ။ စာရေးသူလည်း မိမိ အချိန် ပေးနိုင်သည့် ရက်တွင်မှ တရားစခန်းဝင်နိုင်ခဲ့ပါသည်။ ထို့ကြောင့်လည်း ၂၀၁၇ ခုနှစ် စက်တင်ဘာလ ၃ ရက်မှသာ တရားစခန်းသို့ ဝင်ရောက်ပြီး တရားအား ထုတ်နိုင်ခဲ့ပါသည်။

အောင်ဗောဓိ မြေဇင်းတောရဓမ္မရိပ်သာတွင် ထိုအချိန်က တရားစခန်းဝင်နေသော ယောဂီ စုစု ပေါင်းမှာ ၂၆ ဦးသာရှိပါသည်။ သံယာတော်များနှင့် သီလရှင် ဆရာလေးများလည်း လာရောက်တရား အားထုတ်ကြပါသည်။ တရားစခန်းသို့ ဝင်ရောက်ခြင်း အတွက် ဆွမ်းစရိတ် ကျခံစရာမလိုပါ။ တရားစခန်း မှ အားလုံးတာဝန်ယူ ကျွေးမွေးပါသည်။ ထို့အပြင် အဆိုပါ တရားရိပ်သာတွင် ဆွမ်းအလှူရှင်များ ပေါ များလှပါသည်။ မိမိလှူဒါန်းလိုသည့် ဆွမ်းရက်ကို ကြိုတင်၍ တောင်းခံထားရပါသည်။

တရားစခန်း၏ တရားကျင့်စဉ်များမှာ ကန္နီ ဆရာတော်ကြီးနှင့် မောင်းထောင်း မြေဇင်းဆရာ တော်ကြီးများ၏ လမ်းညွန်ပြသပေးသော ကျင့်စဉ် များပင် ဖြစ်ပါသည်။ ပထမပိုင်းတွင် သမထဘာဝနာ ကို အာနာပါနနည်းဖြင့် ကျင့်ကြံအားထုတ်ရပြီး ဒုတိယပိုင်းတွင် သမထဘာဝနာဖြင့် ရရှိလာသော သမာဓိအင်အားကို အသုံးပြု၍ ဝိပဿနာဘာဝနာကို ပွာများ အားထုတ်ရခြင်းဖြစ်ပါသည်။ သမထ ဘာ ဝနာကို အားထုတ်ရာတွင် မျက်စိကို အဝတ်စည်း၍ အလင်းရောင် မဝင်ရောက်နိုင်စေရန် ကာကွယ်ထား ရပြီး အလင်းနိမိတ်များ ရရှိသည်အထိ အာနာပါန ကမ္မဋ္ဌာန်းကို ပွားများအားထုတ်ရပါသည်။ ယောဂီ တစ်ဦးသည် သမာဓိအား ကောင်းလာပြီး အလင်း နိမိတ်များ ရရှိသည်နှင့် သမာဓိအလင်းနိမိတ်များကို အသုံးပြုပြီး မြန်မာနိုင်ငံ အတွင်းရှိ စေတီပုထိုးများကို နိမိတ်ဖြင့် သွားရောက်၍ ဘုရားဖူးနိုင်ပါသည်။ ထိုကဲ့ သို့ သမာဓိနိမိတ်အား ကောင်းလာပါက စေတီ၊ ပုထိုးများ၏ အတွင်းဌာပနာတိုက်အတွင်းသို့ပါ ထိုး ဖောက်ဝင်ရောက်နိုင်ပြီး ဌာပနာပစ္စည်းများကို မြင် တွေ့နိုင်ပါသည်။

စာရေးသူသည် အောင်ဗောဓိ မြေဇင်း တောရ ဓမ္မရိပ်သာတွင် တရားစခန်းသို့ဝင်ရောက်ပြီး တရားကျင့်ကြံအားထုတ်ရာတွင် သမာဓိ အလင်း နိမိတ်များရရှိပြီးနောက် ဆရာတော်၏ စေခိုင်းချက် အရ တရားစခန်းအတွင်းရှိ ဓမ္မာရုံ ဆွမ်းစားဆောင် သိမ်တော်ကြီးနှင့် ရေကန်တို့ကို အလင်းနိမိတ် စေ လွှတ်၍ ကြည့်ရှုရပါသည်။ တရားစခန်းဝင် ယောဂီ များကို တရားပြသော ကမ္မာဋ္ဌာနဆရာတော်မှာ ဦး ကုမာရ(အရှင်ကုမာရ) ဖြစ်ပါသည်။ စာရေးသူသည် ပထမအကြိမ် အလင်းနိမိတ်ကို လွှတ်ပြီး ကြည့်ရှု ရာတွင် ယောဂီများ စုပေါင်းတရားထိုင်ရာ ဓမ္မာရုံသို့ စတင်ကြည့်ရှုပါသည်။ ထိုသို့ ကြည့်ရှုရာတွင် ဓမ္မာရုံ ကို စောင့်ရှောက်လက်ရှိသော နတ်နှစ်ပါးကို တွေ့ရ ပါသည်။ အဆိုပါ နတ်နှစ်ပါးမှာ ဓမ္မာရုံဝင်ပေါက်ကြီး ၏ တစ်ဖက်တစ်ချက်စီတွင် မတ်တပ်ရပ်လျက် အနေအထားကို မြင်တွေ့ရပါသည်။ အဆိုပါနတ်များ ဝတ်ဆင်ထားသော နတ်ဝတ်စုံမှာ ရွှေရောင် အဆင်း ရှိပါသည်။ ထို့ပြင် ဓမ္မာရုံအတွင်းရှိ ဘုရားဆင်းထုတော် နားမှာလည်း နတ်များကို တွေ့ရပါသည်။ သို့သော် လည်း စာရေးသူအနေနှင့် ယောဂီများ၏ ဆွမ်းစား ဆောင်နှင့် သိမ်တော်ကြီးကို ကြည့်ရှုရာတွင် မည် သည့် ပုဂ္ဂိုလ်ကိုမျှ မတွေ့မမြင်ရပါ။ အချို့သော ယောဂီများကမူ ဆွမ်းစားဆောင်တွင် နဂါးကြီးကို တွေ့ရကြောင်းနှင့် နဂါးကြီးမှ စောင့်ရှောက်လျက် ရှိကြောင်း ပြောကြပါသည်။ စာရေးသူ၏ အတွေ့ အကြုံအရမူ တန်ခိုးရှိသော ပုဂ္ဂိုလ် ဥပမာ နတ်များ၊ နဂါးများသည် သူတို့ကို မြင်တွေ့လိုပါက ကိုယ်ထင် ပြလေ့ရှိပြီး ဆန္ဒမရှိပါက ကိုယ်ရောင်ဖျောက်ထား လေ့ရှိကြပါသည်။

တရားစခန်းအတွင်းရှိ သိမ်တော်ကြီး၏ ဘေး တွင် ရေကန်လေးတစ်ကန် ရှိပါသည်။ ကွန်ကရစ် ရေကန်လေးဖြစ်ပြီး ရေကန်၏ အောက်ခြေတွင် ကျောက်ပြားများခင်းထားပြီး ရေများကြည်လင်နေ ပါက အောက်ခြေကျောက်ပြားများကို မြင်တွေ့နိုင်ပါ သည်။ စာရေးသူသည် နိမိတ်ဖြင့် ထိုရေကန်သို့ ကြည့်ရှုရာတွင် နဂါး သုံးကောင်ကို တွေ့မြင်ရပါ သည်။ ထိုသို့တွေ့မြင်ရမှုမှာ မူလနဂါးပုံစံအတိုင်း တွေ့မြင်ရခြင်း ဖြစ်၍ ရေပေါ်တွင် ခေါင်းကိုသာ မြင်ရပြီး ကိုယ်လုံးများကို မမြင်ရပါ။ နဂါး၏ ကိုယ် လုံးများမှာ ရေအောက်တွင် နှစ်မြုပ်နေပါသည်။ စာရေးသူလည်း အဆိုပါနဂါးများသို့ မေတ္တာပို့ခြင်း၊ အမျှအတန်း ဝေခြင်းတို့ကိုပြုလုပ်ခဲ့ရာ နဂါးများသည် စာရေးသူဘက်သို့ ကြည့်ရုံသာကြည့်၍ ငြိမ်သက် နေကြပါသည်။ ယောဂီအချို့ကမှု ရေကန်တွင် နဂါး ရှိကြောင်းနှင့် တွေ့မြင်ဖူးကြောင်း ပြောကြပါသည်။ ရံဖန်ရံခါ လူယောင်ဆောင်ထားသည်ကိုလည်း မြင် တွေ့ရကြောင်းနှင့် စာရေးသူက နဂါးမှန်း ဘယ်လိုသိ သလဲဟု မေးမြန်းရာ သူ၏ဦးခေါင်းထိပ်တွင် နဂါး အမောက်ကလေးကို ပြသကြောင်းနှင့် ယောဂီတစ်ဦး ကမူ နဂါးအမြီးကို ပြသကြောင်းနှင့် တွေ့မြင်ရ ကြောင်း ရှင်းပြကြပါသည်။

စာရေးသူသည် နဂါးများကို တွေ့မြင်ရခြင်း ဖြင့် ရေကန်အောက် (သို့မဟုတ်) မနီးမဝေးတွင် နဂါးသိုက်ရှိနိုင်သည်ဟု ခန့်မှန်းပါသည်။ ထို့ပြင် ရှေ့ဆုံးတွင်ရှိသော နဂါးကြီးသည် နဂါးမင်းဖြစ်နိုင် သည်ဟု ယူဆပြီး မိမိသည် နိမိတ်ဖြင့် မြန်မာပြည် အနှံ့ ဘုရားဖူးသွားပါက မိမိနှင့်အတူ ဘုရားဖူးလိုက် နိုင်ပါကြောင်း ဖိတ်ခေါ်လိုက်ပါသည်။ ထိုကဲ့သို့ ဖိတ် ခေါ်လိုက်ခြင်းမှာ ယခင်က အတွေ့အကြုံအရ ရုက္ခစိုး နတ်များ၊ နဂါးမင်းများသည် စာရေးသူ ဘုရားဖူး သွားရာတွင် အတူလိုက်ပါနေကြခြင်းကြောင့် ဖြစ်ပါ သည်။ မကြာမီပင် နဂါးကြီးများသည် မြင်ကွင်းမှ ပျောက်ကွယ်သွားကြပါသည်။

စာရေးသူသည် ဆရာတော်၏ စေခိုင်းချက် အရ မြန်မာပြည်အနှံ နိမိတ်ဖြင့် ဘုရားဖူးရာတွင် ရံဖန်ရံခါ နဂါးမင်းကြီးသည် အတူလိုက်ပါ ဘုရားဖူး လေ့ရှိပါသည်။ နဂါးမင်းသည် စာရေးသူနှင့်အတူ ဘုရားဖူးလိုက်ရာတွင် လူမင်းသားပုံစံကဲ့သို့ ဝတ်စား ဆင်ယင်ကာ လိုက်ပါလေ့ရှိပြီး ခေါင်းတွင် နဂါး အမောက်ကလေး ပါလေ့ရှိပါသည်။ ထို့အတူ စခန်း အတွင်းရှိ မဟာဗောဓိပင်တွင်ရှိသော ရုက္ခစိုးနတ်မင်း ကြီးသည်လည် ရံဖန်ရံခါ လိုက်ပါလေ့ရှိရာ ဝတ်ဖြူ စင်ကြယ်ဝတ်ထားသော အဘိုးအိုပုံသဏ္ဌာန်ဖြင့် လည်းကောင်း၊ ယောဂီဝတ်စုံဖြင့်လည်းကောင်း လိုက်ပါလေ့ရှိပါသည်။

စာရေးသူသည် ဆရာတော်၏ စေခိုင်း ချက်အရ ဘောဂဝတီ နဂါးပြည်ရှိ မြတ်စွာဘုရား ၏စွယ်တော်ကို နိမိတ်ဖြင့် ဖူးမြော်ရန် သွားရောက် ရပါသည်။ ထို့ကြောင့် စာရေးသူသည် တရားမထိုင်မီ ကပင် ရုက္ခစိုးနတ်မင်းနှင့် နဂါးမင်းတို့အား အာရုံပြု၍ ဘောဂဝတီနဂါးပြည်သို့ စွယ်တော်မြတ်ကို ဖူးမြော်ရန် သွားရောက်မည်ဖြစ်၍ အတူလိုက်ပါရန် ဖိတ်ခေါ် လိုက်ပါသည်။ ထို့နောက် တရားထိုင်ပြီး နိမိတ်ရ သည်အထိ သမာဓိကို တည်ဆောက်ပါသည်။ ထို့ နောက် နိမိတ်ရသည်နှင့် တစ်ဖန် ရုက္ခစိုးနတ်မင်း နှင့် နဂါးမင်းတို့အား အတူလိုက်ပါရန် ထပ်မံ ဖိတ် ခေါ်ပါသည်။ ထိုကဲ့သို့ ဖိတ်ခေါ်ပြီးသည်နှင့် ကမ္ဘာ မြေကြီး၏ ရေအောက် နက်ရှိုင်းသောနေရာတွင် တည်ရှိသည့် ဘောဂဝတီနဂါးပြည်သို့ အာရုံညွတ် လျက် နိမိတ်ကို လွှတ်လိုက်ရာ စာရေးသူသည် မေ့မျောသွားသကဲ့သို့ ခံစားရပြီး မြေကြီးထဲသို့ တိုးဝင်သွားပါသည်။

စာရေးသူအနေနှင့် ထိုကဲ့သို့တိုးဝင်သွားတိုင်း မြေကြီးသည် နှစ်ခြမ်းကွဲသွားပါသည်။ စာရေးသူ သည် ဘေးဘယ်ညာသို့ ကြည့်လိုက်ရာ ရုက္ခစိုး နတ်မင်းနှင့် နဂါးမင်းတို့ကို မိမိနှင့် ဘေးခြင်းယှဉ် လျက် လိုက်ပါလာသည်ကို တွေ့ရပါသည်။ ထိုကဲ့သို့ ကမ္ဘာမြေကြီးကို ထိုးဖောက်ဝင်ရောက်သွားပြီး မကြာမီပင် ရေထုကြီးကို တွေ့ရပါသည်။ အဆိုပါ ရေထုကြီးသည်လည်း နှစ်ခြင်းကွဲသွားပြီး ထိုအထဲသို့ ထိုးဖောက် ဝင်ရောက်သွားရပါသည်။ ရေထုကြီးမှာ များစွာနက်ရှိုင်းပါသည်။ ထိုကဲ့သို့ ရေအောက်အနက် ထဲသို့ ထိုးဖောက်ဝင်ရောက်သွားပြီး မကြာမီ အဆောက်အအုံတစ်ခု၏ မုခ်ဦး အဝင်ဝကြီးကို မြင်တွေ့ရပါသည်။

စာရေးသူမြင်တွေ့ရသည်မှာ ရေထဲတွင် တည်ဆောက်ထားသည့် ပုံစံမျိုး ဖြစ်နေပါသည်။ ရေထုကို ဖောက်ထွင်းပြီး မြင်နေရခြင်းဖြစ်ပြီး ၄င်း၏ ပတ်ဝန်းကျင်တွင် ငါးများသည်လည်း ရေထဲတွင် ကူးခတ်သွားလာနေသည်ကို မြင်တွေ့ရပါသည်။ မိမိတို့လည်း မုခ်ဦးအဝင်ဝမှ အဆောက်အအုံ အထဲ သို့ဝင်ရောက်ရာတွင် ခန်းမကြီးတစ်ခုထဲသို့ ရောက်ရှိ သွားပါသည်။ ထိုခန်းမကြီးမှာ ကြီးမားကျယ်ပြန်လှပြီး နဂါးများကို သူတို့၏မူလ နဂါးပုံစံအတိုင်း လှုပ် ရှားသွားလာနေကြသည်ကို မြင်တွေ့ရပါသည်။ ထို့ပြင် ထိုခန်းမကြီးထဲတွင် ရေ လုံးဝမရှိသည်ကို လည်း ထူးဆန်းစွာ တွေ့မြင်ရပါသည်။ ခန်းမကြီး အလယ်လောက်တွင် အရွယ်အစားကြီးမားသော နဂါးမင်းကြီးအား တွေ့မြင်ရသဖြင့် မိမိအနေနှင့် နဂါးမင်းကြီးအား စူးစိုက်ကြည့်ကာ မေတ္တာပို့ခြင်း၊ မိမိပြုလုပ်ခဲ့သမျှ ကောင်းမှုကုသိုလ်တို့ကို အမျှဝေ ခြင်း ပြုလုပ်ကာ မြတ်စွာဘုရား၏ စွယ်တော်ကို ဖူးတွေ့လိုကြောင်း ဆန္ဒပြုလိုက်ပါသည်။ ထိုအခါ နဂါးမင်းကြီးသည် စာရေးသူတို့အား သူ့နောက် လိုက်ရန် အမူအရာပြပြီး ရှေ့မှ ခေါ်ဆောင်သွား ပါသည်။ ထို့နောက် ခန်းမကြီးတစ်ခုထဲသို့ ရောက် သောအခါ မြတ်စွာဘုရားပုံတော် ဆင်းတုတော် တစ်ဆူ တွေ့ရပြီး ထိုဆင်းထုတော်ရှေ့တွင် ကလပ် ကလေးပေါ်၌ ညှပ်၍ တင်ထားသော စွယ်တော်မြတ် ကို ဖူးတွေ့ရပါသည်။

စာရေးသူနှင့်အတူ အားလုံးလည်း စွယ်တော် မြတ်အား ဖူးမြော်ကန်တော့ကြပါသည်။ ခန်းမကြီး တစ်ခုလုံးမှာ အရောင်တဝင်းဝင်းနှင့် တောက်ပနေပါ သည်။ ထို့နောက် နဂါးမင်းကြီးအား ကျေးဇူးတင် ကြောင်းနှင့် ပြန်တော့မည်ဖြစ်ကြောင်း ပြောကြားရာ တွင် နဂါးမင်းကြီးက မုခ်ဦးအဝင်ဝအထိ လိုက်ပို့ ပါသည်။ ထို့နောက် မိမိတို့လည်း ရေထု၊ မြေထုတို့ ကို ဖြတ်သန်းပြီး ပြန်လည်ရောက်ရှိလာကြပါသည်။

စာရေးသူသည် နဂါးနှင့်ပတ်သက်၍ စာပေ များတွင် ဖော်ပြပါရှိသော အချက်အလက်တို့ကို စာ ဖတ်သူများ သိရှိနိုင်ပါရန် အောက်ပါအတိုင်း ဖော်ပြ အပ်ပါသည်။

နဂါးများ မျိုးဆက် ပြန့်ပွားရေးအတွက် ပေါက်ဖွားရာတွင် လေးမျိုး ရှိပါသည်။ ၄င်းတို့မှာ –

(၁) ဥမှပေါက်ဖွားခြင်း (ငှက်များကဲ့သို့ ဥမှ ပေါက်ဖွားခြင်း)၊

(၂) အကောင်လိုက် ပေါက်ဖွားခြင်း (သား အိမ်ဖြင့်မွေးဖွားခြင်း)၊

(၃) သစ်ပင်၊ ဝါးပင် (သံသေဓဇ)ကိုစွဲ၍ သန္ဓေတည်ပြီး ပေါက်ဖွားခြင်း၊

(၄) ဥပ္ပပတ္တိဘဝ အရွယ်အစား အသက် အရွယ်အလိုက် ဘွားခနဲ ပေါ်လာခြင်း (နတ်များ၊ ဗြဟ္မာများကဲ့သို့ ပေါ်ပေါက်လာခြင်း) စသည်တို့ ဖြစ်ပါသည်။

ထို့ပြင် နဂါးများလူယောင်ဆောင်၍ မဖန် ဆင်းနိုင်သော အချိန်ကာလများရှိကြပါသည်။ ゞင်း တို့မှာ

(၁) နှစ်နှစ်ခြိုက်ခြိုက်အိပ်ပျော်နေသည့်အချိန်

(၂) သန္ဓေတည်နေသည့်အချိန်နှင့် မွေးဖွား ချိန်

(၃)     ကွယ်လွန်သေဆုံးသည့်အချိန်

(၄)       အရေခွံလဲနေသည့်အချိန်

(၅) နဂါးဇာတ်တူများ ဖို/မ ပျော်ပါးနေသည့် အချိန်

စာပေများတွင် ဖော်ပြထားချက်အရ နဂါး များသည် တိရစ္ဆာန်မျိုးနွယ် ဖြစ်သည်ဟုဆိုသော် လည်း နတ်နဂါးများလည်း ရှိကြသည်ဟု ဆိုပါသည်။ လူယောင်ဖန်ဆင်းနိုင်ပြီး တန်းခိုးကြီးမားသော နတ် နဂါးများလည်း ရှိကြပါသည်။ ဥပ္ပပတ္တိဘဝဖြင့် ပေါက်လာသော နဂါးသည် နဂါးများထဲတွင် တန်ခိုး အကြီးဆုံးဖြစ်သည်ဟု ဆိုပါသည်။ နတ်နဂါးဟု ယူဆနိုင်ပါသည်။ မြတ်စွာဘုရား၏အောင်ခြင်း ရှစ် ပါးတွင် နန္ဒောပနန္ဒ နဂါးသည် မြင်းမိုရ်တောင်ကို ပထ်ထားသဖြင့် နတ်ပြည်သည် မှောင်အတိကျသွား ပြီး ရှင်မဟာမောဂ္ဂလာန်ကလည်း နှိမ်နှင်းခဲ့ရကြောင်း ကြားသိခဲ့ရဖူးပါသည်။ မြတ်စွာဘုရား ပွင့်တော်မူရာ အိန္ဒိယနိုင်ငံ ဗုဒ္ဓဂါယာရှိ သတ္တသတ္တာဟ နေရာ ခုနစ်နေရာအနက် ဆဌမ သတ္တာဟနေရာ မုဉ္စလိန္နာ ရေအိုင်ဘေးတွင် ခုနစ်ရက် စံမြန်းစဉ် လေကြီး မိုးကြီးကျသဖြင့် မုဉ္စလိန္နာနဂါးက မြတ်စွာဘုရားအား လေဒဏ်မိုးဒဏ်မှ ကာကွယ်ပေးခဲ့ကြောင်း လေ့လာ ဖတ်ရှုဖူးပါသည်။

ထို့အပြင် နဂါးများသည် သက်တမ်း အလွန် ရှည်လျားကြကြောင်းနှင့် ကာလနဂါးမင်းသည် ဘုရား တစ်ကြိမ်ပွင့်မှ အိပ်ရာမှ တစ်ခါနိုးကြောင်း စာပေများ တွင် ဖတ်ရှုရပါသည်။ ထို့အပြင် လူသားများနှင့် ရင်းနှီးကျွမ်းဝင်၍ လူသားများနှင့်လည်း ဖို/မ ပျော်ပါးနိုင်ကြကြောင်း ဖတ်ရှုလေ့လာမိပါသည်။ စာရေးသူအနေနှင့် မိမိ တွေကြုံသိရှိထားသည့် အချက်အလက်များကိုသာ ရေးသားဖော်ပြထားခြင်း ဖြစ်ပါကြောင်း ဖော်ပြပါသည်။

 

မင်းဘုန်းရွှေ

Comments

comments

Post Author: manawmaya